(BERNARD TAGUINOD)

HINDI bumenta sa dating chairman ng House committee on justice na si Deputy Speaker Rufus Rodriguez ang tangka ng ilang sektor na kulayan ng pulitika o ibang motibo ang impeachment case na isinampa laban kay Supreme Court (SC) Associate Justice Mario Victor Leonen.

Matatandaang inihain ni Ed Cordevilla, secretary-general of the Filipino League of Advocates for Good Governance (FLAGG) ang reklamo laban kay Leonen noong Disyembre ng nakalipas na taon.

Sa ANC interview ni Rodriguez na tumatayong vice chairman ng nasabing komite, mistulang sinupalpal nito ang mamamahayag na si Christian Esguerra dahil inilutang ng huli ang posibleng pulitika sa likod ng pagsasampa ng impeachment case laban kay Leonen.

Matatandaang si Leonen ang ponente sa desisyon sa protesta ni dating Senador Bongbong Marcos laban kay VP Leni Robredo na inihain sa Supreme Court, tumatayong Presidential Electoral Tribunal (PET).

“We could not jump to the motive of filing or deciding whether or not it is political. We are going to look at the allegations in the complaints — whether there are sufficient grounds and evidences for that,” sagot ni Rodriquez sa tanong ni Esguerra.

Ayon sa mambabatas, ang posibilidad ng motibong pulitika sa usapin ay puro haka-haka pa lamang.

“So of course, they are saying that this may be connected with the case of former Senator Bongbong Marcos and Vice President Robredo, but we will look beyond all of these allegations and suspicions and we have to go into the complaint,” aniya.

Itinaon ang pagbibigay ng motibo habang papalapit ang pag-iimbestiga ng Justice committee na pinamumunuan ni Leyte Rep. Vicente “Ching” Veloso sa impeachment case laban kay Leonen.

Subalit ayon kay Rodriguez, hindi dapat haluan ng ispekulasyon ang kaso at sa halip ay tumutok lamang ang mga ito sa ebidensya na isinumite ni Cordevilla laban kay Leonen.

“When we have the complaint, then we have to look for form and substance and then if there is existence of this two, we proceed now to requiring the answer and once we have the answere, we have the documents. Once we have the documents, we will determine whether sufficient ground exist,” dagdag pa ng mambabatas.

Dahil dito, hindi umano dapat haluan ng kung ano-anong espekulasyon ang isinampang kaso laban kay Leonen dahil magbabase lamang ang mga ito sa kasong isinampa at hawak na ebidensya ng complainant.

Samantala, pormal nang binasa kahapon sa plenaryo ng Kamara ang referral ng Rules Committee na pinamumunuan ni Majority Leader Martin Romualdez sa impeachment complaint laban kay Leonen.

Bago ito ay nagpulong ang Rules committee at nagmosyon si Iloilo City Rep. Julienne “Jam” Baronda na isama sa Order of Business ang impeachment complaint na hindi naman tinutulan ng mga miyembro ng komite ni Romualdez.

Dahil dito, inaasahan na agad sisimulan ni Veloso ang proseso sa impeachment complaint laban kay Leonen sa lalong madaling panahon.
Sakaling hindi sufficient in form ang reklamo ay ibabalik ito sa complainant sa susunod na tatlong araw subalit kapag nadetermina na nasa tamang porma ang reklamo ay agad namang tutukuyin ang sufficiency in substance ng kaso.

Sa reklamo ni Cordevilla, pasok sa culpable violation of the constitution si Leonen “for failing to dispose of at least thirty seven (37) cases within twenty four months as mandated by Section 15 (1), Article VIII, in relation to Section 16, Article III of the Constitution, which mandates the prompt action and speedy disposition of cases”.

Pinatulog din umano ni Leonen ang mga election protest na isinampa laban sa mga nanalong congressmen sa House committee on electoral tribunal (HRET) kung saan siya ay tumatayong chairman.

Pasok din umano si Leonen sa kasong Betrayal of Public Trust dahil sa kabiguin nito na ihain ang kanyang Statement of Assets, Liabilities and Networth (SALN) noong 2004, 2005, 2006, 2007, 2010, 2011 na pagbabalewala sa Saligang Batas at Republic Act (RA) 6713 o “Code of Conduct and Ethical Standards for Public Official and Employees”.

Sakaling mapatunayan ng komite ang mga alegasyong ito laban kay Leonen ay iaakyat ang kanilang desisyon na iakyat sa Senado na siyang magsisilbing Impeachment court ang article of impeachment .

Gayunpaman, kailangang ng 101 boto o katumbas ng 1/3 sa miyembro ng Kamara ang article of impeachment na ieendorso ng komite sa plenaryo bago iakyat ang kaso sa Impeachment court.

Maaari ding hindi tapusin ng komite ang kanilang paglilitis sa kaso kapag sa gitna ng proseso ay aabot sa 101 congressmen ang sasama kay Congressman Marcos-Barba na unang nag-endorso sa kaso ni Leonen.